Chelsea gerðu sér ferð til stálborgarinnar Sheffiled og sóttu þangað þrjú dýrmæt stig. Leikurinn mun seint vinna til verðlauna fyrir mikil gæði en flestir sóknarmenn beggja liða voru í krummaskó í þessum leik. Mikið jafnræði var með liðinum í fyrri hálfleik, jafnvel þó okkar menn hafi verið meira með boltann. Það marktækasta á fyrstu mínútunum var þegar dómari leiksins flautaði víti á Ben Chilwell fyrir brot á Chris Basham en sá síðarnefndi var rangstæður í aðdraganda brotsins, þannig vítið stóð ekki. Það var svo á 43' mínútu að Werner slapp inn fyrir vörn Sheffield manna og gaf góða sendingu á Mason Mount sem kláraði færið mjög vel.
Síðari hálfleikur var ögn fjörugri en sá fyrri. Toni Rudiger og Edouard Mendy ákváðu í sameiningu að bjóða upp á eitt stykki sprelli-sjálfsmark sem kom heimamönnum aftur inn í leikinn. Fyrsta markið sem okkar menn fá á sig undir stjórn Tuchel var s.s. sjálfsmark. Skömmu síðar fengu okkar menn svo dæmda vítaspyrnu, aftur slapp Werner í gegn og óheppinn Ramsdale rak höfuðið í Werner í úthlaupinu. Í fyrstu dæmdi dómarinn ekkert en Varsjáinn kom okkar mönnum til bjargar. Jorginho skoraði af punktinum annan leikinn í röð.
Fátt markvert gerðist meira í leiknum, sóknarmenn okkar manna voru ekki í stuði og takturinn og flæðið í sóknarleiknum eftir því.
Expected goals baradaginn:
Umræðupunktar
Tuchel hrissti aðeins upp í liðinu, Chilwell, Giroud og Christensen komu inn í liðið frá því gegn Spurs.
Christan Pulisic var óvænt ekki í leikmannahópnum eftir að hafa meiðst á síðustu æfingu fyrir leik.
Hakim Ziyech hefur fengið lítin spiltíma hjá Tuchel, fær ekki mínútu í þessum leik, þrátt fyrir að Havertz og Pulisic séu báðir frá vegna meiðsla.
Tammy Abraham virðist líka vera aðeins úti í kuldanum hjá Tuchel.
Allt skal gert til þess að koma Werner í gang. Greinilegt að Tuchel er að reyna spila Werner í svipaðri stöðu og þegar hann skoraði mest hjá Leipzig, í fljótandi stöðu fyrir aftan annan (stærri) framherja. Werner skoraði síðast í deildinni 8. nóvember.
Erum í 5. sæti, aðeins 1 stigi á eftir Liverpool sem eru í því fjórða. Þetta er fljótt að breytast og okkar menn komnir á fulla ferð aftur í baráttuna.
Einkunnir leikmanna
Mendy - 6: Þarf að taka smá ábyrgð á þessu sjálfsmarki. Kallaði hann á Rudiger? Kallaði hann nægilega hátt á Rudiger?
Rudiger - 5,5: Mjög bagalegt sjálfsmark sem hann bar meginábyrgð á. Þeir segja í Englandi að "when in doubt, kick it out" - Rudi hefði bara átt að flengja þessum upp í stúku.
Azpilicueta - 6,5: Fínn bardagi hjá Azpi. Reyndi að styðja við sóknarleikinn og átti nokkra ágæta krossa. Lenti aldrei í neinum vandræðum varnarlega.
Christensen - 8: Mjög góður leikur hjá Dananum. Stóð vaktina vel í fjarveru T. Silva og var virkilega góður í uppspilinu. Hans besti leikur í langan tíma. Maður leiksins.
Chilwell - 6: Það sést ágætlega á sóknarleiknum okkar að Chilwell er fyrst og fremst bakvörður - ekki vængbakvörður. Hann er óöruggur með staðsetningarnar sínar og þarf að passa betur upp á rangstöðuna, því Tuchel vill sækja á vængbakvörðunum.
R. James - 7: Fínasta frammistaða hjá Reece. Hjálpaði mikið til í sóknarleiknum og gerði vel varnarlega. Er að finna sitt besta form aftur.
Kovacic - 6,5: Ekki eins framúrskarandi leikur og gegn Spurs og Burnley. Króatinn gerði samt ágætlega en var ekki að finna þessar öflugu sendingar fram á við eins og í undanförnum leikjum.
Jorginho - 7: Svipað og hjá Kova, var of mikið "hliðar saman hliðar" sendingar. En Jorgi stóð vel varnarlega og gerði vel að skora úr vítinu undir mikilli pressu.
Mount - 7: Flott mark hjá Mason Mount og hann leiðir pressuna frábærlega. Það vantaði samt upp á gæðin hjá honum, sem og öðrum, í þessum leik.
Werner - 7: Þetta var ekkert spes leikur hjá Werner, það verður bara að segjast. En hann átti risa þátt í báðum mörkum liðsins og það lyftir honum upp í "solid sjöu". Verður að fara finna markaskónna sína.
Giroud - 6: Gekk lítið upp hjá Giroud kallinum. Var í slagsmálum við miðverði en takturinn í liðinu var ekki góður þannig þjónustan var takmörkur.
Hudson-Odoi - 6: Reyndi að láta hlutina gerast en lítið gekk upp hjá CHO.
Alonso- 6: Áhugaverð skipting að taka Chilly B. útaf. Mögulega vildi Tuchel auka hæðina í liðinu því löngu boltarnir voru farnir að fljúgja hjá Sheff Utd.
Kante - 6,5: Korter sem Kante fékk í kvöld. Varnarskipting til að hafa liðið þéttara síðustu mínúturnar. Kante stóð sig ágætlega í sínu hlutverki.
KTBFFH
- Jóhann Már