Maresca farinn - leikur við City

Keppni:  Enska Úrvalsdeildin

Tími, dagsetning: Sunnudagur 4. janúar 2026 kl. 17:30

Leikvangur:  Etihad Stadium

Dómari:   Michael Oliver

Hvar sýndur:  Sýn Sport

Upphitun eftir:  Þráinn Brjánsson

Ég vil byrja þessi skrif á því að óska ykkur öllum gleðilegs árs og þakka ykkur líflegar og skemmtilegar umræður á árinu sem leið. Vona ég einnig að þið hafið haft einhverja ánægju og skemmtun af því að lesa það sem við skrifum fyrir ykkur. En það er óhætt að segja að nýtt ár byrji með alvöru sprengju fyrir klúbbinn okkar en á Nýársdag var það tilkynnt að Enzo Maresca væri hættur sem stjóri klúbbsins. Reyndar okkur stuðningsmönnum ekki alls ókunnugt þar sem atvinnuöryggi þjálfara hjá Chelsea er afar ótraust. Sá ítalski var búinn að vera þjálfari liðsins í 547 daga þó, og þegar yfir árangurinn er farið þá getur hann gengið nokkuð uppréttur frá borði. Undir hans stjórn unnum við meðal annars Sambandsdeildina, heimsmeistaramót félagsliða og náðum Meistaradeildarsæti aftur. Það sem kemur samt svolítið á óvart er undanfarinn að þessum atburði. Um miðjan desember sagði hann á blaðamannafundi eftir sigur á Everton að síðustu 48 klukkustundirnar hefðu verið þær verstu síðan hann tók við starfinu, og sagðist óánægður með lítinn stuðning en tilgreindi þó ekki beinlínis frá hverjum sá stuðningur átti að koma. Né hvað hefði valdið þessari vanlíðan hans í tvo sólarhringa og vöktu þessi orð hans mikla athygli.

Hins vegar duldist það engum að samband hans bæði við stuðningsmenn og stjórn klúbbsins var orðið eins og veglegur þorrabakki, þetta mál var farið að lykta afar leiðinlega. Gengi okkar manna hefur verið afleitt í desember og ráðleysi og umdeildar ákvarðanir Maresca fóru þvert ofan í stuðningsmenn sem hafa lítið þanþol. Ég hef alltaf sett svolítið spurningamerki við stjórn klúbbsins og þá menn sem þar eru í efstu stöðum. Ótal kenningar fara á flug og er það ekkert skrítið þegar Maresca hefur talað í hálfkveðnum vísum undanfarið. En hann og læknateymi liðsins hafa til dæmis ekki verið að dansa í takt varðandi álagsstýringu leikmanna og mat á því hvernig úr þeim málum sé unnið. Einnig hafa heyrst raddir þess efnis að hann hafi hreinlega verið að búa til vandamál milli sín og stjórnar, og verið að fá sig leystan frá samningi til þess að taka við liði Manchester City næsta sumar. Chelsea án Maresca heldur auðvitað áfram, eins og Chelsea gerir alltaf. Nýr þjálfari kemur með nýja hugmyndir, nýja framtíðarsýn og sömu leikmennina sem þurfa að læra allt upp á nýtt. Við stuðningsmenn drögum djúpt andann, uppfærum X reikningana okkar og sannfærum okkur sjálf um að þetta sé verkefnið sem mun loksins endast. En hver verður það sem tekur við keflinu? Sá sem líklegastur þykir þessa stundina er þjálfari Strasbourg sem einnig er í eigu BlueCo og heitir Liam Rosenior, 41 árs Englendingur. Ég verð að vera hreinskilinn og viðurkenna að ég veit bara alls ekki neitt um þennan mann nema að þetta er fyrrum varnarmaður og lék meðal annars með Ipswich, Fulham, Hull City og síðast Brighton frá 2015 til 2018.

Hann er klárlega í miklum metum hjá stjórn Blueco og hefur náð ágætis árangri með lið Strasbourg sem er það yngsta í Evrópu ef við horfum í fimm efstu deildir með meðalaldur upp á 21,4 ár og er það að meðaltali fjórum til fimm árum yngra en önnur lið. Þetta held ég að sé eitthvað sem stjórnarmönnum í BlueCo hugnast vel þar sem stefnan hefur verið að kaupa kornunga leikmenn á lítinn pening, skóla þá svo til og selja þá síðan með góðum hagnaði. Ég er alveg grjótharður á því að Blueco er ekki að reka klúbbinn af einskærri knattspyrnuástríðu og þetta er grjótharður bissness. Það sem ég hef mestar áhyggjur af er reynsluleysi hans. Það er fjarri því það sama að stýra klúbb í Championship eða öðrum deildum í Evrópu og við höfum ekki góða reynslu af vonarstjörnum úr deildum utan Englands og við munum vel eftir Andre Villas-Boas sem átti að verða lausn á öllum okkar vandamálum.

Er ástæða til að hafa áhyggjur af því að hann verði jámaður og fari í einu og öllu eftir því sem stjórnin krefst og þá hverjir eiga að spila? Ég er ekki viss um að reynslumeiri stjórar hafi áhuga á að starfa undir járnhæl og ákvörðunum sem þeim hugnast ekki. En það er ljóst að spennandi tímar eru framundan hjá klúbbnum okkar hver svo sem verður næsti stjóri. Einnig er félagaskiptaglugginn opinn, en ég held að það verði afskaplega lítið að frétta af þeim vígstöðvum þennan janúar mánuðinn og áherslan verði lögð á nýjan þjálfara, en ef ég ætti að veðja - þá set ég mitt á Liam fyrrnefndan Rosenior. En látum þetta nægja af pælingum í bili og einbeitum okkur að næsta leik en þar mætum við Manchester City á Etihad leikvanginum í Manchester.

Chelsea

Það er ljóst að nýr maður verður á hliðarlínunni á sunnudaginn en á fréttamannafundi á föstudag sat Calum McFarlane fyrir svörum, en hann mun stýra liðinu gegn City. Farlane þessi er þjálfari U21 liðs Chelsea og hefur verið að gera fína hluti. Á blaðamannafundinum viðurkenndi hann að síðasti sólarhringur hafi verið líkt og hvirfilvindur, en áhugaverður að sama skapi. Jákvæðar fréttir eru þær að Cucurella er farinn að æfa aftur og mun líklega taka einhvern þátt í leiknum. Svo er það spurningin um hvernig okkar menn koma stemmdir inn í leikinn þegar óvissa er um þjálfara og hlutirnir dálítið í lausu lofti. Meiðslalistinn er ekki langur nema fastagestirnir og það hefur reyndar oft gerst að menn sýna sínar bestu hliðar þegar á móti blæs. Við verðum að vona að okkar menn komi dýrvitlausir til leiks. Leikurinn gegn Bournemouth var leiðinlegur jafnteflisleikur og ekki minnisstæður fyrir neitt nema hvað Estevao er vaxandi leikmaður og mikið lifandis skelfing hvað ég held að hann eigi eftir að verða okkur dýrmætur. Fátt reyndar um þennan leik að segja nema að Joao Pedro skoraði mark úr efri hillunum og væri ég alveg til í að sjá þau fleiri og heppnin var með okkur í fyrra markinu. Gusto var fínn, Palmer átti fína spretti og Estevao var frábær. 

Manchester City

Það eru hreinar línur að City verður það lið sem berst við Arsenal um titilinn og þó þeir hafi hikstað um mitt tímabil, þá virðast þeir aftur vera komnir á beinu brautina. Norska buffið er upp á sitt besta þessa dagana og terroriserar varnarmenn ítrekað. Þrátt fyrir að vera með meistarakandidata í öllum stöðum í byrjunarliði, þá er bekkurinn ekki árennilegur og gæti auðveldlega unnið deildina líka. Mitt álit er að á góðum degi er þetta besta lið ensku Úrvalsdeildarinnar.

Liðsuppstilling og spá:

Oft hefur verið spennandi að spá og spekúlera en sjaldan eins og núna þar sem Maresca er horfinn á braut með hattinn sinn. Eitt er ljóst að við þurfum hraða, kraft og ákveðni til að eiga einhvern möguleika gegn City. Held að Sanchez verði í rammanum og fyrir framan hann verða þeir Cucurella, Fofana, Reece James og Gusto og það verður ekki brugðið út af vananum með leikkerfi og verður spilað upp á 4-2-3-1. Caicedo og Enzo verða á miðjunni og þar fyrir framan þeir Palmer, Pedro Neto og Estevao og Joao Pedro verður fremstur. Þetta gæti orðið til að góð úrslit gætu orðið að veruleika. Alltaf gott að vera bjartsýnn í byrjun árs og ég veðja á 2-3 í skemmtilegum leik 

Góða skemmtun og áfram Chelsea!